Nyob rau niaj hnub nim no lub
ntiajteb kev vam meej yim huam dav zuj zus tuaj. Neeg yim txawj ntse tuaj yim muaj tswv yim yus tsiaj yug txhuv hlob
sai heev los ntawm tej tshuaj. Luag tsim tau tej tshuaj yug npua 3 hlis xwb ces
npua twb muaj 70-100kg lawm, yog hais tias yug li peb cov laus ib txwm yug mas
yuav tsum yog li 1 xyoos mus rau 2 xyoo mam li tau tug loj li ntawd. Nyob qaib
mas 3 hlis xwb twb loj muaj 2-3kg lawm, hos yog yug li cov laus ib txwm mas yog
li 6-12 lub hlis mam li loj taus li ntawd. Muab hais luag muaj ntau yam tshuaj
uas koj yuav muaj peev xwm ua rau tus tsiaj ntawd hlob sai tshaj ntawd ntau
npaug heev. Tiamsis yog peb niaj hnub noj tej nqaij li no yuav ua rau peb lub
cev muaj ntau yam mob uas kho nyuaj heev. Muaj tej tus raug tej yam mob uas
tsis muaj peev xwm kho tau.
Ntawm no peb yuav tham txog tej
tswv yim uas yug npua rau ntawm peb Hmoob. Nyob li luag lwm haiv neeg mas luag
ua lag ua luam ua ntau yam heev, tiamsis peb Ib tsoom niam txiv kwv tij neej
tsa Hmoob nyob pem toj siab tseem ua liaj ua teb thiab tu tsiaj tus txhuv xwb,
vim li no tej kev yug tsiaj kuj tseem ceeb heev rau peb thiab. Tib lub sijhawm
uas luag yug npua los ntawm tej tshuaj li ntawd tiamsis peb ib co Hmoob nyob
Thaib teb lawv txawj yug npua tsis pub tshuaj tiamsis nws ho loj hlob sai ib
yam thiab tau muag sai ib yam.
Cov tswv yim no yog los ntawv xib
hwb Yaj Pliaj Ntxawg nyob rau Tsheej Maim thaib teb uas tus ua dhua los lawm.
Tseem ceeb yog ntawm cov Qhauv npua. Nws hais tias koj ua qhauv npua koj yuav
tau muaj:
1 1. Ib
kawg taub ntoos muab xwv daj(maum kuab).
2 2. Ob
hnab hmoov thaj quav ntsuas (thaj kab tsib, ib txhia hu ua thaj quav nyuj).
Yuav cov uas lawv muab ua tej hnab ua hmoov tiam sis yuav hom daj daj.
3 3. 3-4
lub thoob ntim qhauv npua kom loj siab txij neeg hauv siab (nyob ntawm koj cov
npua ntau los tsawg yuav li qhov koj cheem tsum).
4 4. Ib
co zaum npuas kom txaus koj cov npua noj li ib lim tiam.
Tswv Yim Ua: Muab cov taub ntoos
uas twb muab xwv daj no tsuav mos mos. Thaum tsuav tag muab tso rau ib lub
thoob thiab muab cov thaj quav ntsuas ntawd coj los xyaw rau, muab hauj kom zoo
thiab thaum hauj tag lawd muab xwv rau lub thoob ntawd txog thaum uas nws muag
muag thiab tsw qab ntxiag. Thaum li no lawd koj muab cov zaub npuas uas koj twb
muaj ntxawd tsuav coj los tso cov thoob ntawd kom puv thiab ib thoob twg koj
muab hwb uas luag muag tom khw es hais hais dej es loj zog, ib thoob ntawd koj
hauj li 3 hwb rau, koj muab xwv txog tag kis koj cia li daus nqa rau npua noj
xwb, ib hnub twg koj ua rau ib lub thoob es koj thaij tau sib hloov. Nco ntsoov
cov zaub npuas tsis tag yuav muab hau siav, cia li pub nyoos xwb. Yog hais tias
cov me nyuam npua koj yuav los koj yuav tau maj mam muab rau nws noj, xub thawj
koj yuav tau pub me ntsis qhauv siav rau nws noj, koj pub tsawg zuj zus ces koj
mam li tsis pub. Yog tam sim koj yuav kiag los koj cia li pub tej txhia nws
yuav tsis kam noj.
Tus sau: Tswvyim Xyooj
